حاتـــــــــــــــــة تركض

السلام
عليكم ,, اليوم أستيقظت الصبح قبل راسي بساعة ,, شون حلم فاتكم والله
مكانكم خالي حاتة اتخبل بصفي و دا نركض ,, ليش ما اعرف و كلساع تكلي بسرعة
بسرعة مكبل وية حرامي والله مدا افتهم ,, و تركض و اني الهث وراها و اكلها
شنو الجمال لك يا جمال يا عبد الناصر هو شكو ؟ و جاهل مصلخ حافي اذاناته
جبيرة ترفرف باوع علينة و اشر باصبعه اللي كلها عمبة و كال هثولاكمة لذموهم
و العالم ورانة ,شمسوين منو هاية اللي دا تركض ما اعرف زين اذا الشرطة
لزمتني بالحلم يخلوني اكعد من النوم ؟؟؟ والله ما ااعرف و اللي ديركضون
ورانة مو شرطة , انما المطافي شنو هال حلم مال مجانين هذا , المهم الظاهر
من الركض تعبت فد مرة فكتلها للحاتة من رخصتج اني راح استيقظ لان صارلي
هواية نايم ترة من ال 9 بلليل اشوفج على نومة الظهر عود ,,

و هسة دا
اخبر على اي واحد من جماعتي توة كاعد من النوم دا اشوف وينها , لزموها لو
شنو لان اذا اعترفت عليه بعد ما انام الى ان تهدأ الامور
المهم ,,
استيقظت ,, بطبيعة الحال كما تقتضي الامور ,, سلكت قميصي و لبست بيضتين

اريد اطلع
كمشت يدة الباب جان انجوي ( الظاهر الجو كلش بارد )
هناك وشفت
ابنية جميلة وشورجة ( شورجة شنو ! ) اقصد حلوة وطبعآ جان الجو الحرارته 73
وظليت أباوع ( اني هم لزكت منغولي و شاف علج بعد أو في رواية أخرى علج و
لزك اببطانيه !!!)

وره 5
دقايق اشوف راسي ماع ( مواني راسي صيني معاد ميتحمل )
رجعت
للمطبخ وها مطبخنا بي ميزة كلش حلوة ,, انه الثلاجة و الطباخ جوة المطبخ ,,
مو بالطرمة ,, حتى راسا واحد يستعملها مو يبقى رايح جاي مثل الخبل ,
وينتهي العمر الافتراضي للطركة

ورحت داغسل
وجهي , لان ورة اسبوعين بيت خالتي جايين و لازم استغل دخولي المبجل لمنطقة
الحمام ( يقع على خط عرض 32 ضمن اقليم بيتنا ) , المهم شو افتح البوري ,,
اباوع هيج سبحان الله الماء فعلا لا طعم و لا لون و لا رائحة اذن شفاف ,لان
شو كلشي ماكو مديت ايدي اريد اغسل ماكو شي شو ما اتبللت ,ضربت نفسي راشدي و
خليت الخاولي على خدي ماكو اثر مياه بصورة تامة , احتاجيت 34 دقيقة حتى
ادرك انه الماء المذكور فوقا مكطوع بصورة ملونة قصدي بصورة تامة ,, من
هلكد ما مامكطوع حسيت البوري من جوة مزنجر وكاعد تجري بي عمليات انشائية
لبناء بيت للاخ عنبكوت
,,
كلت بسيطة
مستر بوري اكو اختراع اسمه بطالة مال مي كلت احميه شوية
اجيت خليتة
عال نار و اشعل الطباخ طلعتلي مسج عال قنينة ,,
" رصيد القنينة
لا يكفي لاجراء هذه العملية , يرجى اعادة تعبئة رصيد قنينتك لطفا والا
سيتم قطع الخدمة خلال 4 ايام و اتكضيها عال سعف مع تحيات شركة قنينتنا "
كلت هم مو
مشكلة ,, اروح اشتري قنينة مال غاز و افضها ,,
اتذكرو انه
الهوسة كلها هاي لان بس ردت اغسل وجي ,, لعد لو اريد اسبح شجان سوة الفكر
وياية ؟ جان احتركت المجرة يمكن او جان صار زلزال بوزارة الري و التعليم اي
مو دمجوها سوة )

وهسة اني
كامش سرة على الخانزين بانة انتظرقنينة غاز واي واحد يشوفني من منتدى
الحشاشة خلي يجي يوكف بمكاني حتلو بس دقيقة لان استلك جدي من الثمث مدري
الدمر لان بثراحة بعد مااميز لان اعيوني خلصن شحن